திருப்பைஞ்ஜீலி

இறைவர் : நீலகண்டர், ஞீலவனேசுவரர்

இறைவி : விசாலாட்சி

பதிகம் : சம்பந்தர் 1 + அப்பர் 1 + சுந்தரர் 1 = ஆக 3

தலமரம் : ஞீலி

ஸ்ரீஞீலவனேசுவர ஆலயம். பெரிய கோயில். திருப்பைஞ்ஜீலிச் சிவபெருமான், நாவுக்கரசருக்கு கட்டமுது தந்த வரலாறு அழகிய ஓவியமாக, கோயிலில் தீட்டப் பட்டுள்ளது. இராச கோபுரத்துக்கு எனப் பெரிய அளவில் அதிட்டானம் போடப்பட்டுள்ளது. ஆனால் அது பல ஆண்டுகள் கழிந்து, இன்றும் மொட்டைக் கோபுரமாகவே உள்ளது. உள்ளே 3 நிலைக் கோபுரம் உண்டு. தலமரம் ஞீலி (ஒரு வகைக் கல்வாழை). வாகனங்கள் உண்டு. அம்பாள் கோயில் கிழக்கு பார்த்தபடி. சுவாமி கோயில் இடது பக்கம் தனியாக உண்டு. அப்பருக்கு கட்டமுது கொடுத்த திருவிழா, அவருடைய குருபூசைத் தினமாகிய (Incomplete)

சோழநாடு, காவிரி வடகரை : 61

திருஓமாம்புலியூர்

இறைவர் : துயரம்தீர்த்தநாதர்

இறைவி : பூங்கொடி

பதிகம் : சம்பந்தர் 1 + அப்பர் 1 = ஆக 2

தீர்த்தம் : தீர்த்தம்

அளவான கோயில். மண்ணிப்படிக்கரை ஆற்றிற்கு மேற்குக்கரையில் இருக்கிறது. தக்ஷிணாமூர்த்தி பெரிய அளவில், மகாமண்டபத்தில், வடக்குப் புறத்தில், தெற்கு நோக்கி எழுந்தருளி உள்ளார். தக்ஷிணாமூர்த்தியிடம் அம்மையார் பிரவண மறை கேட்டருளிய தலம். புலிக்கு அஞ்சிய வேடன் ஒருவன், ஒரு குளத்தங்கரையில் உள்ள மரத்தில் ஏறி, இரவு முழுவதும் கண் விழித்திருப்பதற்காக, அம்மரத்தில் இருந்து இலைகளை ஒவ்வொன்றாக கீழே போட்டு வந்தான். அடுத்த நாள் காலையில் பார்க்கும்போது, மரம் வில்வ மரமாகவும், அதன் கீழே இருந்தது சிவலிங்கம் ஆகவும், அவன் பறித்துப் போட்ட வில்வத்தளிர்கள் சிவலிங்கத்தில் வீழ்ந்ததாகவும், அன்று இரவு முழுவதும் அவனுக்கு வேட்டை (Incomplete).

சோழநாடு, காவிரி வடகரை : 31

திருப்பாய்ச்சிலாச்சிரமம் (திருவாசி)

இறைவர் : மாற்றறிவரதர், நீலகண்டேசுவரர்

இறைவி : விசாலாட்சி

பதிகம் : சம்பந்தர் 1 + சுந்தரர் 1 = ஆக 2

தீர்த்தம் : அன்னமாம் பொய்கை, பிரமதீர்த்தம், தாமிரபரணி

தலமரம் : வன்னி

பெரிய கோயில். கட்டுமலைமேல் இருக்கிறது. மூலவர் (சிவலிங்கம்) சுயம்பு. கோயில் மேற்கு பார்த்த சந்நிதி. 5 நிலை இராச கோபுரம். சுற்றுமதில் பெரிது. பிரமோற்சவம் வைகாசி விசாகத்தை ஒட்டி நடைபெறுகிறது. இங்கு நடேசர் பாம்பின் மேல் நின்று, நடனம் ஆடுகிறார் (முயலகன் இல்லை). இறைவருக்கு சடை இல்லை, குடுமிதான் உண்டு. கோயிலைச் சுற்றி, சுற்றுமதிலுக்கு உள்ளும், புறமும் நல்ல குளிர்சியான மரங்கள், சோலை, தோப்பு. கொல்லிமழவன் என்னும் அரசனின் புதல்வியைப் பீடித்த முயலகன் என்னும் நோயை, சம்பந்தர் பதிகம் பாடி, நீங்கவைத்தார். இறைவர் சுந்தரருக்காக ஆயிரம் செப்புக்காசு கொடுத்து, பின் அவற்றை பொற்காசாக்கியவர். அதனாலே இறைவருக்கு மாற்றறிவரதர் என்னும் பெயர் உண்டு.

பயண வசதிகள் உண்டு. விருத்தாசலம்-திருச்சி மார்க்கத்தில், பிச்சாடனார் கோயில் இருப்புப்பாதை நிலையத்தில் இருந்து 5 கி.மீ. திருவானைக்காவில் இருந்து 5 கி.மீ. திருச்சி-சேலம் நெடுஞ்சாலை வழியே செல்லும் பேருந்துகள் இவ்வழியே செல்கின்றன.

சோழநாடு, காவிரி வடகரை : 62

திருப்புகலூர்

இறைவர் : அக்கினீசுவரர், புகலூர்ப்புண்ணியன், கோணப்பிரான்

இறைவி : கருந்தாட்குழலி

பதிகம் : சம்பந்தர் 1 + அப்பர் 5 + சுந்தரர் 1 = ஆக 8

தீர்த்தம் : அக்கினி தீர்த்தம்

கோயிலும், கோபுரமும் பெரியன. கிழக்கு, மேற்கு, வட புறங்களில் கல்லால் கட்டப்பட்ட அகழி இருக்கின்றது. இறைவர் சுயம்பு. சற்றே சரிந்திருக்கிறார். சந்திரசேகர் கோயில் சிறப்பாய் உள்ளது. எதிரில் அக்கினி தேவர் திருவுருவம் உண்டு. திருநாவுக்கரசர் அங்கு எழுந்தருளி உள்ள சிவனோடு கலந்து, “புண்ணியா உன் அடிக்கே போதுகின்றேன் பூம்புகலூர் மேவிய புண்ணியனே” என்று போற்றி, “நண்ணரிய சிவானந்த ஞான வடிவே” ஆகினார். அவருடைய திருமேனிகள் மிகமிக சாந்நித்தியமாக விளங்குகின்றன. அவர் உழவாரத் தொண்டு செய்யும்போது, அவரை மயக்கத் தோன்றிய பொன்னையும், மணிகளையும் கையினால் தீண்டாது, உளவாரத்திலேயே ஏந்தி, “பூங்கமல வாவியினப்புக” எறிந்தார். தேவமாதர் விண்ணில் இருந்து இறங்கி, ஆடல்-பாடல்களால் அவரை மயக்க முயன்றபோது, “நான் திருவாரூர் ஐயனுக்கே அல்லால் உங்களுக்கு ஆட்படேன்” என்று பாட, அவர்கள் தோற்று மீண்டனர். இங்கு சித்திரை சதயத்தை முன்னிட்டு, பத்து நாள், நாவுக்கரசரது வாழ்க்கையை விபரிக்கும் திருவிழா (திருவதிகையில் போல்) நிகழ்கிறது. வைகாசி விசாகத்தை வைத்து, பத்து நாள் பிரமோற்சவம் நிகழுகிறது. சுந்தரர் தலையணையாக வைத்துப் படுத்த செங்கல், பொற்கற்களாக மாறின. முருகநாயனார் பிறந்து, பூக்கள் எடுத்து, விதம் விதமான மாலைகள் புனைந்து, இறைவர்க்கு கொடுத்து, பேறு அடைந்த திருத்தலம். இங்கு அவருடைய திருமடம் ஒன்று இருந்தது. அம்மடத்தில் நாயனார், சம்பந்தர், நாவுக்கரசர், சிறுத்தொண்டர், நீலநக்கர் முதலிய நாயன்மார்களையும் எழுந்தருளச் செய்து, அவர்களுக்கு பலநாள் அமுது படைத்தது, உபசரிக்கும் பெரும்பேறு பெற்றவர்.

பயண வசதிகள் பல உண்டு. நன்னிலம் இருப்புப்பாதை நிலையத்தில் இருந்து 6½ கி.மீ. மயிலாடுதுறை, வேதாரணியம் முதலிய இடங்களில் இருந்து பேருந்துகள் பல உண்டு.

சோழநாடு, காவிரி தென்கரை : 75

திருப்புள்ளிருக்குவேளூர் (வைதீஸ்வரன் கோயில்)

இறைவர் : வைத்தியநாதர்

இறைவி : தையல்நாயகி

பதிகம் : சம்பந்தர் 1 + அப்பர் 2 = ஆக 3

தீர்த்தம் : சித்தாமிர்த தீர்த்தம்

தலமரம் : வேம்பு

பெரிய கோயில். 2 பெரிய கோபுரங்கள். புள் (சடாயு, சம்பாதி என்னும் பறவைகளும்), இருக்கு (வேதம்), வேள் (முருகன், சூரியன்) பூசித்த படியால் இப்பெயர் வந்தது. இது வைத்தீஸ்வரன் கோயில் என வழங்கப்பெறுகிறது. மேற்கு நோக்கிய சந்நிதியில் சித்தாமிர்தம் என்னும் பெரிய தீர்த்தக் குளம், நீராழி மண்டபத்தோடு உண்டு. தேவலோகத்தில் சித்தர்கள் கூடி, சிவனுக்கு செய்த அபிஷேக தீர்த்தம், ஒன்று கூடி இங்கு வந்து சேர்ந்தமையால், இப்பெயர் ஆயிற்று. தீராத நோய்களை தீர்த்து அருளும் இயல்பு இதற்கு உண்டு. இறைவருக்கு வைத்தியநாதர் என்று பெயர். இங்கே செல்வமுத்துக்குமாரர் சந்நிதி மிகச்சிறப்பு. மாதம் தோறும் வரும் கார்த்திகை நக்ஷத்திரத்தில், முற்பகல் செல்வமுத்துக்குமார சுவாமிக்கு பெரிய திருமுழுக்கு, சிறப்பு விழா முதலியன வசந்த மண்டபத்தில் நிகழும். இரவு வெள்ளி ரத்தத்தில் திருவீதிவலம் வருவர். திருமுழுக்கு ஆட்டிய பன்னீர், பால், சந்தனம் முதலியன சேர்ந்த கலவைத் தீர்த்தத்தை, அடியார் வாங்கி உட்கொள்வர். பலவித நோய்கள் தீர்ந்துவிடும். செவ்வாய் கிரகம் இறைவனைப் பூசித்து, பேறு பெற்றதனால், இத்தலம் அங்காரக தோஷ நீக்கத்துக்கு புகழ் பெற்றது. அங்காரகன் சிலா, தாமிர விக்கிரகங்கள் தனித்தனியே உண்டு.

பயண வசதிகள் பல உண்டு. சிதம்பரம்-மயிலாடுதுறை பாதையில், சீகாழியில் இருந்து 6 கி.மீ தூரத்தில் உண்டு. சிதம்பரம்-மயிலாடுதுறை வழிப் பேருந்துகள் வைதீஸ்வரன் கோயில் கிழக்கு திருவாயிலில் நின்றே, அப்பாற் செல்லும். இருப்புப்பாதை நிலையம் ½ கி.மீ தூரத்தில் இருக்கிறது. இங்கிருந்து திருப்புன்கூர் 4 கி.மீ. திருக்கண்ணார் கோயில் 2½ கி.மீ. இங்கிருந்து பட்டவர்த்தி வழியே கும்பகோணம் செல்லும் பேருந்துகள் திருப்புன்கூர், திருப்பனந்தாள், ஸ்ரீகாசிமடம், சேய்ஞ்ஞலூர், திருவிடைமருதூர், திருபுவனம் முதலிய தலங்கள் ஊடகச் செல்லும்.

சோழநாடு, காவிரி வடகரை : 16

திருப்புன்கூர்

இறைவர் : சிவலோகநாதன்

இறைவி : சொக்கநாயகி

பதிகம் : சம்பந்தர் 1 + அப்பர் 1 + சுந்தரர் 1 = ஆக 3

பெரிய கோயில். பெரிய இராச கோபுரம். 2 கி.மீ தெற்கே உள்ள ஆதனூரில் பிறந்து, வளர்ந்த திருநாளைப்போவார் நாயனார் இத்தலத்துக்கு தினமும் சென்று, புறத்தே நின்று வழிபாடு செய்வார். ஒருநாள் இவர் வழக்கம்போல வெளியே நின்று வழிபாடு செய்யும்போது, இறைவர் தம்முன் இருந்த மிகப்பெரிய நந்தியை விலகச் செய்து, காட்சி கொடுத்தது அருளினார். கோயிலின் கிழக்கில், கோபுரத்தின் முன், திருக்குளத்தின் அருகே அவர் நின்று கும்பிட்ட இடத்தில் ஒரு சிறு சந்நிதியில், சிரசின்மேல் கூப்பிய கைகளோடு நின்று, கருவறையில் உள்ள மூலவரை முழுமையாக நேரே தரிசிக்கும் நிலையில் உள்ள திருமேனி, ஏந்திய கைகளுடன், தனிச் சந்நிதியில் எழுந்தருளி உள்ளார். கோயிலுக்கு வெளியே கிழக்கே உள்ள குளத்தை விட, மேற்கே பள்ளமாக இருந்த நிலத்தில், வேறொரு குளத்தை வெட்டி, திருப்பணி செய்தார். சுந்தரரும், ஏயர்கோன் கலிக்காமரும், தனித்தனியே உள் சென்று வழிபட்ட தலம். முதல் மழை பெய்யவும், பின் நிற்கவும் சுந்தரர் பதிகம் பாடினார். கலிக்காமர் இறைவருக்கு 12 வேலிநிலம் வழங்கினார். அவர் அவதரித்த திருப்பேறுமங்கலம், திருப்புன்கூருக்கு வடக்கே 2 கி.மீ தொலைவில் உண்டு. அங்கே ஒரு சிறு சிவாலயம் உண்டு. அங்கே கலிக்காமருக்கு தனிச் சந்நிதி உண்டு.

பயண வசதிகள் உண்டு. வைதீஸ்வரன் கோயிலில் இருந்து கும்பகோணம் சாலையில் 2 கி.மீ தூரம் சென்று, திருப்புன்கூரை அடைந்து, அங்கிருந்து இங்கு செல்லலாம். மணல்மேடு, கும்பகோணம் பேருந்துகள் இவ்வழியே செல்கின்றன.

சோழநாடு, காவிரி வடகரை : 20

திருமருகல்

இறைவர் : மாணிக்கவண்ணர்

இறைவி : வண்டுவார்குழலி

பதிகம் : சம்பந்தர் 2 + அப்பர் 1 = ஆக 3

தீர்த்தம் : மாணிக்கத் தீர்த்தம்

தலமரம் : மருகல்

கோயில் பெரிது. மாடக்கோயில். தாமன் என்னும் வணிகனால் வஞ்சிக்கப்பட்ட செட்டிப்பிள்ளையோடு, அவனில் இரக்கம் கொண்ட தாமனின் கடைசிப் பெண், அவனை திருமணம் செய்ய, அவனோடு வந்து, திருமருகல் கோயிலில் தங்கி இருக்கும்போது, அவனைப் பாம்பு தீண்ட, அவன் உயிர் துறந்தனன். பிரிவு ஆற்றாது, மனைவி அழுது புலம்ப, சம்பந்தர் அவளில் கருணை கொண்டு, பதிகம் பாடி, செட்டிப்பிள்ளையை உயிர்ப்பித்து, அவர்கள் இருவருக்கும் திருமணம் செய்து வைத்த தலம். தேவி திருமுன்னுக்கு நேரே, வீதியில் விடந்தீர்த்த விநாயகர் எழுந்தருளி உள்ளார். சிறுத்தொண்ட நாயனாரின் செல்வன் சீராளன், பைரவருக்கு நரபலியாகும் போது, அவன் படித்த பள்ளிக்கூடம் இங்கு இருந்தது. இது இன்று வேறு தேவைக்காக பயன்படுத்தப் படுகிறது. பக்கத்தில் உள்ள குளம் சீராளம் குளம் எனப்படுகிறது. கோயிலைச் சேர்ந்து ஒரு மடம் இருக்கிறது. சிறுத்தொண்டர் சீராளனைக் கூட்டிவரச் சென்றபோது, அவன் அம்மடத்தில் தான் இருந்தான் என்கின்றனர்.

பயண வசதிகள் உண்டு. திருப்புகலூர்-திருச்சாத்தமங்கை பாதை பேருந்துகள், திருமருகல் கோயில் அருகால் செல்கின்றன. திருப்புகலூரில் இருந்து ஆற்றைக் கடந்து, இராமனதீச்சரம், திருச்செங்காட்டங்குடி, திருமருகல் வழியே, திருச்சாத்தமங்கை வரை பேருந்திலும், கால் நடையாகவும் செல்லலாம். செங்காட்டங்குடியில் இருந்து 3½ கி.மீ.

சோழநாடு, காவிரி தென்கரை : 80

திருமாந்துறை

இறைவர் : மாந்துறைக்கொழுந்து, ஆம்ராவனநாதர்

இறைவி : அழகால் உயர்ந்த அம்மை, வாலாம்பிகை

பதிகம் : சம்பந்தர் 1

அழகான சிறிய கோயில். 3 நிலை இராச கோபுரம். மூலமூர்த்தி சுயம்பு. மகாமண்டபத்தின் திருவாயிலின் மேலே அழகிய வர்ணச் சித்திரம் ஒன்று உண்டு. அதில் வலப்புறமாக பிருங்கி முனிவர் உட்கார்ந்தபடி சுவாமிக்கு பூசை செய்வதாகவும், ஒரு மான் இடப்புறமாகப் படுத்திருந்து வணங்குவதாகவும் ஓவியம் தீட்டப்பட்டுள்ளது. இங்கே ஒருமுறை வேடர்கள் மான் வேட்டை ஆடியபோது, தாய்மான் ஒன்றைக் கொன்று விட்டார்கள். அதன் குட்டிகள், தாய் இல்லாமல் தவித்தபோது, சுவாமியே தாய்மானாக வந்து குட்டிகளைப் பாதுகாத்து, வளர்த்து வந்தார். கோயில் முன் மண்டபத்தில், தாய்மான், குட்டிகள், இலிங்கம் முதலிய திருமேனிகள் சுதை சிற்பங்களாக உள்ளன. இவ் வரலாற்றினால் இத்தலத்துக்கு ‘திருமான்துறை’ என்ற பெயர் வழங்குவதாயிற்று. அம்பாள் கோயில், சுவாமி கோயில் மகாமண்டபத்தை சேர்ந்தால் போல் இருக்கிறது. ஆலயம் மா, பலா, தென்னை, வாழை, நெல், கரும்பு முதலியன நிறைந்த தோப்புக்களும், வயல்களும் பரவி, பசுமையும், அமைதியும் உள்ள மருத நிலத்தில் உள்ளது. பங்குனி மாதம் 1, 2, 3-ம் நாள்களில், காலை உதய சூரியனின் ஒளிக்கதிர்கள் சுவாமியின் மீது வீழ்கின்றன. அம்மூன்று தினங்களிலும் அந்நேரத்தில் சூரிய பூசை மிகப் பக்தி பூர்வமாக நிகழ்கிறது. கோயிலின் உள்ளே உள்ள நவக்கிரக சந்நிதியில், நடுவில் இருக்கும் சூரியமூர்த்தி, சாயாதேவி, சமஞ்ஞாதேவி என்ற இரு தேவியர்களுடன் எழுந்தருளி உள்ளார்.

பயண வசதிகள் உண்டு. திருச்சி-லால்குடி நெடுஞ்சாலையில், திருச்சியில் இருந்து 16 கி.மீ தூரத்தில் உண்டு.

சோழநாடு, காவிரி வடகரை : 58

திருகருப்பறியலூர் (தலைஞாயிறு)

இறைவர் : குற்றம்பொறுத்தநாதர்

இறைவி : கோல்வளைநாயகி

பதிகம் : சம்பந்தர் 1 + சுந்தரர் 1 = ஆக 2

தீர்த்தம் : சூரிய தீர்த்தம்

அளவான கோயில். சீகாழியை ஒத்திருப்பதாலும், சீகாழிக்கு மேற்கே இருப்பதாலும், இதற்கு மேலைக்காழி எனவும் ஒரு பெயர் உண்டு. கன்பநாசிபுரம் என்றும் வழங்கப் பெரும். சீகாழியிற் போல் இங்கும் கட்டுமலைமேல் தோணியப்பரும், தேவியாரும், இன்னும் மேலே சட்டைநாதரும் எழுந்தருளி உள்ளனர். தக்கன் வேள்விக்கு சென்று, பல்லை இழந்த சூரியன் இங்குவந்து வழிபட்டு, அதனைப் பெற்றமையால் தலைஞாயிறானான். வழிபடுவோர் குற்றங்களைப் பொறுப்பவராதலின் இறைவர் “குற்றம் பொறுத்த நாதர்” எனப்படுவர். அகத்தியரின் கமண்டலத்தை காக வடிவில் விநாயகர் கவிழ்க்க, ஓடிய நீர், இங்கு விநாயக நதியாகப் பாய்கிறது. கோயில் ‘கொகுடிக்கோயில்’ எனப்படும். கொகுடி – ஒருவகை முல்லை. அது படர்ந்துள்ள பந்தலும், ஒரு சிவலிங்கமும் திருச்சுற்றில் உள்ளன.

வைத்தீசுவரன் கோயிலில் இருந்து திருப்புன்கூர் வழியாகவும், திருப்பனந்தாளில் இருந்து பட்டவர்த்தனம் வழியாகவும் இத்தலத்தை அடையலாம். பயண வசதிகள் மிகவும் உண்டு.

சோழநாடு, காவிரி வடகரை : 27

திருக்கருக்குடி (மருதாந்த நல்லூர்)

இறைவர் : சற்குணநாதர், சற்குணலிங்கேசுவரர்

இறைவி : சுரும்பார் குழலம்மை, சர்வாலங்கிருதமின்னம்மை

பதிகம் : சம்பந்தர் 1

கோயில் சிறிது. மணல் இலிங்கம். இறைவன், இறைவி திருவிழாத் திருமேனிகள் அளவில் சிறியன. அழகில் சிறந்தன. இத்தலத்தில் இருந்து ஏனாதிநாத நாயனார் பிறந்த தலத்துக்கு 2½ கி.மீ.

கும்பகோணத்தில் இருந்து 5 கி.மீ தூரம்.

சோழநாடு, காவிரி தென்கரை : 69

திருமழபாடி

இறைவர் : மழபாடி மாணிக்கம், வச்சிரதம்பநாதர்

இறைவி : அழகம்மை, சௌந்தரநாயகி

பதிகம் : சம்பந்தர் 3 + அப்பர் 2 + சுந்தரர் 1 = ஆக 6

தீர்த்தம் : கொள்ளிடம்

தலமரம் : பனை

பெரிய கோயில். 7 நிலை இராச கோபுரம். கொள்ளிடக் கரையில் பெரிய சுற்று மதில்கள். உள்ளே 5 நிலைக் கோபுரம். இரண்டு கோபுரங்களுக்கும் இடையில் நந்தி மண்டபம். இது திருமழபாடி வைத்தியநாத கோயில் எனவும் வழங்கப்படுகிறது. வடக்கில் அம்மை கோயில் தனியே உளது. கோயில் முதலாம் இராசராச சோழனால் கட்டப்பட்ட சிறு கோயில்களுள் ஒன்று. நந்தி தேவருக்கும், சுயரை இருவருக்கும், பங்குனிப் புனர்பூசத்தில் திருக்கல்யாணம் நிகழ்ந்த தலம். ஐயாறப்பர் அன்று இங்கு எழுந்தருளி நடத்தி வைத்திருக்கிறார். இதனாலே, நந்திதேவரும், சுயசை தேவியாரும் சித்திரைப் பௌர்ணமியில் திருவையாறுக்கு எழுந்தருளி, ஐயாறப்பர்-தேவியோடு ஏழூர் செல்லும் விழா நடைபெறுகிறது.

காலையில் ஐயாறப்பரும், தேவியாரும், நந்திதேவரும், தேவியாரும், வெவ்வேறு பல்லக்கில் புறப்பட்டு, திருப்பழனம் எழுந்தருளி, பின் முறையே, திருச்சொற்றுத்துறை, திருவேதிகுடி, திருக்கண்டியூர் முதலிய தலங்களில் எழுந்தருளி, சிறப்புப் பூசனைகளில் அமுது முதலியன ஏற்றருளி, திருப்பூந்துருத்தி எழுந்தருளுவர். ஐவரும், அவர்கள் தேவியாரும் அன்று இரவு அங்கு தங்கி, பூசனைகளை ஏற்று, பள்ளி கொள்வர். அடியார்களில் சிலர் திருப்பூந்துருத்தியிலும், ஏனையோர் காவிரிப் படுக்கையில் முழுநிலவில் ஓய்வு எடுப்பார்.

அடுத்த நாள் காவிரியில் தீர்த்தம் ஆடிய பின், புது அலங்காரங்களுடன், ஆறு புஷ்பப் பல்லக்குகளில், ஏழாவது தலமாகிய திருநெய்த்தானம் செல்வர். அங்கு பூசனை, அமுது படைத்தல் முதலியன முடிந்தவுடன், கடைசித் தலமாகிய திருவையாற்றை நோக்கி, எட்டுப் பல்லக்குகளும் செல்லும் காட்சி ஒரு அருமையான காட்சியாகும். காலை ஒன்பது மணியளவில், எட்டுப் பல்லக்குகளில், ஒரே வரிசையில் நின்று, பக்தகோடிகளுக்கு தரும் காட்சி, ஒரு அரிய அற்புதக் காட்சி ஆகும். தவறாது பார்த்து, தரிசிக்க வேண்டியது ஒன்றாகும்.

இறைவர் சுந்தரரை, “இப்பதியை தரிசிக்க மறந்தனையோ?” என்று கேட்க, அவர் உடனே இங்கு எழுந்தருளி, “பொன்னார் மேனியனே” என்று பதிகம் பாடி, மகிழ்ந்த தலம். புருஷா மிருகம் தாபித்த இலிங்கத்தை, அவனால் எடுக்க முடியாததால், “வச்சிரதம்பமூர்த்தி” எனப் பெயர் பெற்றார்.

பயண வசதிகள் பல உண்டு. புள்ளம்பாடி, தஞ்சாவூர் இருப்புப்பாதை நிலையங்களில் இருந்தும், திருவையாற்றில் இருந்தும் பேருந்துகள் உண்டு.

சோழநாடு, காவிரி வடகரை : 54

திருமயிலாடுதுறை

இறைவர் : மாயூரநாதர், வள்ளலார்
இறைவி : அபயாம்பிகை, அஞ்சல்நாயகி

பதிகம் : சம்பந்தர் 2 + அப்பர் 1 = ஆக 3

தீர்த்தம் : காவேரி, இடப் தீர்த்தம்

தலமரம் : மா

கோயில் பெரிது. “ஆயிரம் ஆனாலும், மாயூரம் ஆகாது” என்பது பழமொழி. இறைவி மயில் உருக்கொண்டு இறைவனை வழிபட்ட தலம். இங்கே கௌரிக்காக இறைவன் கெளரி தாண்டவம் ஆடினார். துலா (ஐப்பசி) மாதத்தில், இத்தலத்தில் காவிரியில் தீர்த்தம் ஆடுவது சிறப்பு. கோயிலுக்கு உள்ளும் திருக்குளம் இருக்கிறது. இங்கு முருகப்பெருமான் சந்நிதி சாந்நித்தியம். கந்தசட்டி விழா சிறப்பாக அநுட்டிக்கப் படுகிறது. மயிலாடுதுறை துலா ஸ்நாந கட்டத்துக்கு வடக்கே 2 கி.மீ தூரத்தில் உள்ள வள்ளலார் கோயிலில் உள்ள தக்ஷிணாமூர்த்தி சந்நிதி குறிப்பிடத்தக்கது. தருமபுர ஆதீன 10-ம் மகாசந்நிதானம் ஸ்ரீ-ல-ஸ்ரீ சிவஞான தேசிக பரமாசாரிய சுவாமிகள் அவர்கள், இங்கு எழுந்தருளிய தக்ஷிணாமூர்த்தி மீது பாடிய திருவருட்பா சொல் இன்பம், பொருள் இன்பம், இசை இன்பம் மிக்கது. இங்கு காவிரியின் இடப தீர்த்தக் கரையில் ஆலயத்தில் விசுவநாதர், துண்டி விநாயகர், பைரவர் முதலியோர் காசியில் போலவே இங்கும் எழுந்தருளி உள்ளனர். காசிக்கு செல்ல இயலாதவர், இங்கு தீர்த்தம் ஆடி, வழிபாடு செய்தால், காசியில் செய்த பயனைப் பெறுவார். சிவபெருமான் நந்தியெம்பெருமான் மீது, யோகாசனத்தில் ஞான முத்திரையுடன் வீற்றிருக்கும் திருக்கோலம் பார்த்து தரிசிக்கத் தக்கது. காவிரியின் செழிப்பினால் எங்கும் தோப்புக்கள், சோலைகள், வயல்கள் சூழ்ந்திருக்கின்றன.

பயண வசதிகள் மிக்க உண்டு. மயிலாடுதுறையில் இருந்து நான்கு திசைகளிலும் உள்ள தரங்கம்பாடி, சிதம்பரம், தஞ்சாவூர், திருவாரூர், இன்னும் திருப்புன்கூர் வழி கும்பகோணம் முதலிய இடங்களுக்கு செல்லும் ரயில், பேருந்துகள் சந்திக்கும் இடம். இவை நிறைய உண்டு.

சோழநாடு, காவிரி தென்கரை : 39

திருமயிலாப்பூர்

இறைவர் : கபாலீசுவரர்நாதர்

இறைவி : கற்பகாம்பாள்

பதிகம் : சம்பந்தர் 1

தீர்த்தம் : கபாலி தீர்த்தம்

தலமரம் : புன்னை

அளவான கோயில். கிழக்கே வர்ணச் சித்திரங்களால் அமைந்த புராண-இதிகாச வரலாறுகளை விளக்கும் சிற்பங்களைக் கொண்ட 7 நிலை இராச கோபுரம். கோயில் மேற்கு நோக்கிய சந்நிதி உடையது. சுவாமி சந்நிதியில், கோயிலுக்கு வெளியே, பெரிய தீர்த்தக் குளம் உண்டு. அம்மன் சந்நிதி தனியாக, கிழக்கு பார்த்தபடி உளது. பார்வதி அம்மையார், மயில் உருக்கொண்டு, புன்னை மரத்தின்கீழ் இறைவனை வழிபட்ட சந்நிதி, வடக்குச் சுற்றில், மேற்கு பார்த்தபடி உண்டு.

சிங்கராவேலர் என்னும் முருகன் கோயில், தனியே பெரிதாக, மேற்கு பார்த்தபடி சிறப்பாக உளது. எதிரே திருச்சுற்று மாளிகையோடு, அருணகிரிநாத சுவாமிக்கு சிறிய தனிச் சந்நிதி உண்டு.

மயிலாப்பூரின் சிவபத்தி, சிவனடியார் பத்தியில் சிறந்து, கடல் ஓடி, திரவியம் கொண்ட சிவநேச செட்டியாரின் தவப்புதல்வி பூமகளன்ன பூம்பாவை, இறைவருக்கு திருப்பள்ளித் தாமம் எடுக்கும்போது, அரவம் தீண்டி உயிர் நீக்க, அவள் உடலை தகனம் செய்து, எலும்புகளை ஒரு கலசத்தில் வைத்திருந்தார். திருமயிலாப்பூருக்கு திருஞானசம்பந்தமூர்த்தி நாயனார் எழுந்தருளிய போது, அந்த எலும்புகளை அவர் முன்னிலை வைத்து வேண்ட, அவர், “மட்டிட்ட” என்னும் திருப்பதிகம் பாடி, மீண்டும் பெண் ஆக்கினார். பிள்ளையார், உடைந்த கலசம், கலசத்தில் இருந்து வெளியே வந்த பூம்பாவை முதலியவர்களின் சிலா வடிவங்கள் தனிச் சந்நிதியில் உண்டு.

கோயில் தளவரிசைக் கற்களால் ஆனவை. இங்கு அவதரித்த வாயிலார் நாயனாருக்கு தனிச் சந்நிதி உண்டு. இங்கிருந்து ½ கி.மீ தூரத்தில், இங்கு வாழ்ந்த திருவள்ளுவர் கோயில் உண்டு. இப்பகுதியில் காரணீசுரர் முதலிய ஏழு கோயில்களை ஒரே நாளில் வழிபட்டால் எண்ணிய எண்ணங்கள் நிறைவேறும் என்பர். இங்கு அறுபத்து-மூவர் தாமிர சிலா விக்கிரகங்கள் உண்டு. அவரவர் குருபூசைகள் சிறப்பாக நிகழ்ந்து, ஒழுங்காக வீதிவலம் வருதல், தனிச் சிறப்பு. நவராத்திரி ஒன்பது நாளும், கற்பகாம்பாள் தனி அலங்காரங்களுடன் சிறப்பாக காட்சி தருவார்.

பிரமோற்சவத்தில், அதிகார நந்தி சேவையும், அறுபத்து-மூவர் திருவிழாவும், பூம்பாவையை எழுப்பிய திருவிழாவும் மிகச் சிறந்தன. இங்கு பள்ளியறைப் பூசை சிறப்பு. தினமும் பள்ளியறைக்கு திருவடிகள் எழுந்தருளும் போது, திருவாசக சிவபுராணம் படிப்பது குறிப்பிடத்தக்கது. கல்வி, அறிவு, ஒழுக்கங்களில் சிறந்த அந்தணர்கள் பக்தி-பூர்வமாக, நேரம் தவறாது, நியதி தவறாது செய்துவரும் பூசனைகள் பார்க்க வேண்டியன. சென்னை மாநகருக்கு திலகம் போல விளங்கும் இக்கோயில் எழில் மிக்கது.

பயண வசதிகள் மிகுதியாக உண்டு. சென்னை எழும்பூர் இருப்புப்பாதை நிலையத்தில் இருந்து 7 கி.மீ தூரம். பயணப் பேருந்து வசதிகள் நாற்றிசையிலும் இருந்து உண்டு.

தொண்டைநாடு : 24

திருஆவடுதுறை

இறைவர் : மாசிலாமணியீசர்

இறைவி : ஒப்பிலா முலையம்மை

பதிகம் : சம்பந்தர் 1 + அப்பர் 5 + சுந்தரர் 2 = ஆக 8

தீர்த்தம் : கோமுகி

தலமரம் : அரசு

பெரிய கோயில். மிகப்பெரிய நந்தி. புகழ்மிக்க தி.க.ப. திருவாவடுதுறை ஆதீன மடத்தோடு இணைந்திருக்கிறது. அம்மை பசு வடிவாய் இருந்து பூசை செய்தபடியால் இப்பெயர் உண்டாயிற்று. திருமூல நாயனார், இமயத்தில் இருந்து ஆகாய வழியே அகத்தியரை தரிசிக்க பொதியமலை செல்லும்போது, இங்கு வந்து, அரசின் கீழே யோகத்தில் இருந்து, ஆண்டுக்கு ஒரு பாடலாக, மூவாயிரம் பாடல் கொண்ட திருமந்திரத்தை அருளிச் செய்தவர். அவருக்கு கோயிலின் மேற்குப் பிராகாரத்தில் தனியே சந்நிதி உண்டு. திருவிசைப்பா அருளிச்செய்த திருமாளிகைத்தேவர் வாழ்ந்த தலம். சம்பந்தரின் தந்தையார், தாம் வேள்வி செய்ய பொருள் வேண்டும் என்றபோது, சம்பந்தர் பதிகம் பாடி, இறைவன்பால் பொற்கிழி பெற்றுக் கொடுத்தார்.

மயிலாடுதுறை-தஞ்சாவூர் மார்க்கம், நரசிங்கன்பேட்டை இருப்புப்பாதை நிலையத்தில் இருந்து 2 கி.மீ. ரயில், பேருந்து பயண வசதிகள் உண்டு. அம்மார்க்கம் மணல்மேடாக செல்லும் பேருந்தில் சென்று, மடத்து வாயிலில் இறங்கலாம்.

சோழநாடு, காவிரி தென்கரை : 36

திருஇடைச்சுரம் (திரிசூலம், திருவடி சூலம்)

இறைவர் : ஞானபுரீசுவரர், இடைச்சுரநாதர்

இறைவி : இமயமடக்கொடி

பதிகம் : சம்பந்தர் 1

தீர்த்தம் : மதுர தீர்த்தம்

சிறிய கோயில். இராச கோபுரம் இல்லை. கிழக்கு பார்த்த சந்நிதி. கிழக்கில் வாயில் இல்லை. தெற்கில் மொட்டைக் கோபுரம். மூலவர் மரகதலிங்கம். கற்பூர ஒளியில் மிகவும் தெளிவாக காட்சி அருளுவார்.

செங்கல்பட்டு இருப்புப்பாதை சந்திப்பு நிலையத்தில் இருந்து 5 கி.மீ. பயண வசதிகள் உண்டு.

தொண்டைநாடு : 27

திருஇந்திரநீலப்பருப்பதம்

இறைவர் : நீலாசளேசுவரர்

இறைவி : நீலாம்பிகை

பதிகம் : சம்பந்தர் 1

வடநாட்டுத் தலம் ஐந்தினுள் இரண்டாவது. இது ஒரு மலை. கோயில் இல்லை. அர்ச்சுனன் தவம் செய்து, பாசுபதம் பெற்ற தலம். முகாசுரனை வதைத்த தலம். இந்திரன் வழிபட்டதாக சம்பந்தர் தேவாரத்துள் குறிப்பிடுகிறார். திருக்கேதாரம் செல்லும் வழியில் உள்ளது. தூரத்தே நின்று வழிபட்டுக் கொண்டு, பயணத்தை தொடர வேண்டும்.

நேபாளத் தலைநகர் காட்மாண்டுவில் இருந்து 13 கி.மீ. மலைப் பிரதேசம். அடியார் கூட்டத்தோடு நடந்து செல்ல வேண்டும். யாத்திரிகர்களுக்கு வழிகாட்டியாக பல பயண நூல்களும், சுதேசிகளும் உளர்.

வடநாடு : 2

திருவிடையாறு

இறைவர் : இடையாற்றீசர்

இறைவி : சிற்றிடைநாயகி

பதிகம் : சம்பந்தர் 1

சிறிய அழகிய கோயில். பழைய கோயிலின் முற்பகுதி சிதைந்துள்ளது. சுகர் என்னும் முனிவர் வழிபட்டது.

திருவெண்ணெய் நல்லூரில் இருந்து 5 கி.மீ. மாவெண்ணெய் நல்லூர் ரோட்டு இருப்புப்பாதை நிலையத்தில் இருந்து 5 கி.மீ. பயண வசதிகள் பல உண்டு.

நடநாடு : 13

திருஇடுப்பாவனம்

இறைவர் : சற்குணநாதேசுவரர், இடுபவனேசுவரர்நாதர்

இறைவி : மங்களநாயகி

பதிகம் : சம்பந்தர் 1

அளவான கோயில். இடும்பன் பூசித்த தலம். பிள்ளையாருடைய நிறம் வெள்ளை. அதனாலே சுவந்தம் பிள்ளையார் என்ற பெயர் உண்டாயிற்று. கருவறையில் மூலவருக்கு பின்புறம், பார்வதி-பரமேசுவரர், மணக்கோலக் காட்சி அளிக்கின்றார்கள்.

மயிலாடுதுறை-திருத்துறைப்பூண்டி மார்க்கத்தில், திருத்துறைப்பூண்டியில் இருந்து 16 கி.மீ. தில்லைவிளாகம் இருப்புப்பாதை நிலையத்தில் இருந்து 7 கி.மீ. பயண வசதிகள் உண்டு.

சோழநாடு, காவிரி தென்கரை : 108

திருஇராமநந்தீச்சரம் (திருஇராமனதீச்சரம்)

இறைவர் : இராமநேசுவரர்

இறைவி : கருவார்குழலி

பதிகம் : சம்பந்தர் 1

கோயில், கோபுரம் சிறியவை. இராவண சம்காரத்தின் பின், பிரமஹத்தி தோஷத்தோடு வந்தபோது, நந்தீசுவரர் கோபித்தார். அப்போது இராமர், சிவலிங்கம் தாபித்து வழிபட்டார்.

திருப்புகலூர்-திருச்சாத்தமங்கை வழியில், திருப்புகலூரில் இருந்து 4 கி.மீ தூரத்தில் உண்டு. பேருந்து பயண வசதி உண்டு. கால் நடையாகவும் செல்லலாம்.

சோழநாடு, காவிரி தென்கரை : 77

திருவிசயமங்கை

இறைவர் : விசயநாதர்

இறைவி : மங்கைநாயகி

பதிகம் : சம்பந்தர் 1 + அப்பர் 1 = ஆக 2

தீர்த்தம் : அருச்சுன தீர்த்தம்

ஊர் சிறிது. கோயிலும் சிறிது. விசயன் (அர்ச்சுனன்) பூசித்ததால் இப்பெயர் பெற்றது.

கும்பகோணத்துக்கு வட-மேற்கே 20 கி.மீ. பயண வசதி உண்டு.

சோழநாடு, காவிரி வடகரை : 47